آخر رصاصه ف كفي ..
شلتهالك
آخر رصاصه تكفي..
لاغتيالك
يوم ما سيفك يبقى زيف
ولا زيفك يبقى سيف
يوم ياوطني…
م ادهالك
آخر رصاصه
***
الكيل طفح
ابني كان ميّت قتيل
لكنه لسه بيندبح
الكيل طفح
الدمعة ممنوعة
والضحكة ممنوعة
والكلمة ممنوعة
حتى قلمي مستباح
طب قول ازاي نحارب
وإدينا مقطوعة
***
يابايع ملامحك
مين يسامحك
لما يبقى الطهر جارحك
لما يصبح موت ضميرك …
عن سياسة
متصدقوش انهم ….
مش ميّتين الضمير
كل واحد فيهم
ف موت ضميره خبير
مش م النهاردة همَّ بايعين المصير
الخلاصة…..
موت ضميرهم مش مصادفة
موت ضميرهم…
بالوراثة
***
عارف..
لما تبقى بحر ناشف
ويفوتوك الصيادين
عارف..
لما تكون قبطان سفينة
ويبعوك الملاحين
تبقى جوه الدايرة وحدك
تبقى صورتك…
واقفة ضدك
تبقى تايهه فيك سفينتك
ويقلولك ع الكياسه
كرامتي تبقى ف الحصار
مفروض على رجولتي الحراسه
ويقلولي ع الكياسه
انا اللي ف كفي يكفي
انا اللي ف كفي
آخر رصاصه
***
شعر / سالم الفهد
ليست هناك تعليقات:
إرسال تعليق